Sámi njunnošiin ain jahkku davviriikalaš sámesoahpamuššii, Sámit eai váidde sámevaši eiseváldiide, Sápmi Salasta dáiddadállu
Bearjadaga Buorre iđit Sápmi -sáddagis gullat das, go Suoma ja Norgga sámedikkiid njunnošiin lea ain jáhkku davviriikalaš sámesoahpamuššii. Soahpamuša leat gárven jo guoktelot jagi. Maŋimuš jagis 2017 almmustuvai evttohus, mas polihkkariin ledje guovttilágan oaivilat. Bargu lea ain jođus, muhto vuos ii leat diehtu man johtilit sámesoahpamuš dán háveges ovdána. Doaimmaheaddji Susanna Guttorm lea ságastan Suoma sámedikki ságadoalli Duomis Aslak Juusoin ja Norgga sámedikki presideanta Silje Karine Muotkain duorastaga.
75% sámi nuorain leat vásihan sámiváši. Nu čájehii Mihá nammásaš dutkan prošeakta mii čáđahuvvui diibma, muhto sápmelaččaid eai olu váidde sámeváši politiijaide. Noereh organisašuvnna nubbi jođiheaddji Emilie Biti-Jessen jáhká ahte sápmelaš jurdila, ahte "Dán mađe mun gal ferten gierdat", go cielahuvvo.
Håvard Nuhtte Svendsen Sara lea áhččeolmmoš ja servodatberošteaddji, son čálla lohkiidčállosa NuortaSálttu-áviisai sámivaši birra. Son čállá earret eará, ahte skuvllain váilot oahpponeavvut ja jus skuvllain livčče oahpahan eambbo sámiid birra, de dat eastadivččii sámi cielaheami. Son maiddái rahkanahttá bártnažis jo dál dan beaivái, go vásiha sámiváši.
Sápmi Salasta álgoálbmot dáiddadálluprográmma, mas dáiddarat besset bargat iežaset dáidda prošeavttaiguin. Geassemánu vuosttas vahkku deaivvadit njealje dáiddára Deardnás - guokte sámi dáiddára ja okta Kanadalaš ja okta Ruonáeatnanlaš dáiddár.
Anna-Stina Svakko lea okta dain njealje dáiddaris.
Dán jagi leamašan garra goavvejahki mii lea čuohcan garrasit bearrašiidda ja boazodoalloservodahkii sihke ruđalaččat ja dearvvašvuhtii. Norgga Sámediggi ja Davvi Dearvvašvuohta leatge čoahkkinasttán áigumuššan geahčadit mo sáhtet ásahit bissovaš veahkefálaldagaid sápmelaččaide. Guovdageaidnolaš Anne Marie Therese Kemi muitalage mo mo dilli dál lea, maŋŋá dan garra roasu maid su bearaš ja olu earát leat vásihan dán dálvvi.
Sáddaga láidestit Inger-Elle Suoninen, Jörgen Heikki ja Jaana Kynkäänniemi.
Riŋges studioi tlf 016 6757524 dahje sáddes Whatsapp-dieđu nummirii 040 1909114.
Buorre iđit Sápmi.
Till seriens sida arrow_forward_iosDELA:
